Ushtruesja e detyrës së Shefes së Bashkimit Evropian në Kosovë, Eva Palatova, është takuar me Ministrin në detyrë të Punëve të Brendshme, Xhelal Sveçla, ku ka theksuar rëndësinë e respektimit të sundimit të ligjit dhe karakterit multietnik të Kosovës.
Sipas BE-së, institucionet e Kosovës duhet të vazhdojnë të mbështesin sundimin e ligjit dhe të respektojnë karakterin shumëtnik të vendit.
Në takim është ngritur edhe çështja e pretendimeve për veprime të pahijshme nga ana e Policisë së Kosovës. BE-ja ka theksuar se këto pretendime duhet të hetohen, ndërsa çdo masë apo veprim i mëtejshëm duhet të zhvillohet në përputhje me procedurat e rregullta ligjore.
Palatova ka përcjellë gjithashtu qëndrimin e BE-së se Unioni vazhdon ta mbështesë rrugën e Kosovës drejt integrimit evropian.
Megjithatë, BE-ja ka theksuar se edhe Kosova duhet ta bëjë pjesën e saj, përmes përmbushjes së reformave dhe respektimit të parimeve themelore të sundimit të ligjit./teve1.info/
