Shefja në Detyrë e Bashkimit Evropian në Kosovë, Eva Palatova, ka deklaruar se Kosova duhet të përshpejtojë zbatimin e reformave në mënyrë që të përfitojë deri në 882.6 milionë euro nga mbështetja e Bashkimit Evropian përmes Planit të Rritjes.
Ajo i ka bërë këto komente gjatë një debati të organizuar nga Grupi për Studime Ligjore dhe Politike mbi progresin e reformave në Kosovë.
Në takim kanë marrë pjesë edhe Koordinatori Kombëtar për Facilitetin e Reformave dhe Rritjes, Jeton Zulfaj, si dhe anëtarët e Mekanizmit Kombëtar të Konsultimit për Agjendën e Reformave.
“Përmes Planit të Rritjes, BE-ja po mbështet financiarisht vendet e Ballkanit Perëndimor në zbatimin e reformave. Kosova pritet të marrë deri në 882.6 milionë euro, por duhet të përshpejtojë zbatimin e reformave, pasi kjo dritare mundësie mbyllet në dhjetor 2027”, ka thënë Palatova.
Sipas saj, kjo do të kërkojë angazhim të përbashkët politik dhe formimin e shpejtë të institucioneve pas zgjedhjeve të përgjithshme.
Palatova ka theksuar se Bashkimi Evropian mbetet partneri më i fortë dhe më i besueshëm i Kosovës, duke riafirmuar përkushtimin për të mbështetur vendin në përmbushjen e Agjendës së Reformave dhe avancimin e procesit të integrimit evropian./teve1.info/
