Pal Lekaj nuk do të garojë në listën e kandidatëve për deputetë të Aleancës për Ardhmërinë e Kosovës për zgjedhjet e parakohshme parlamentare të datës 7 qershor.
Lajmin e ka bërë të ditur vetë Lekaj përmes një postimi në Facebook, ku ka theksuar se vendimi për tërheqje vjen në funksion të hapjes së rrugës për gjeneratat e reja brenda subjektit politik.
“Sot, pas 26 vitesh, unë kam vendosur që në zgjedhjet e 7 Qershorit të mos garoj në listën e Aleancës, duke hapur dyert për anëtarët e rinj, por duke dhënë mbështetjen time absolute dhe duke u angazhuar edhe më shumë se asnjëherë më parë që Aleanca, bashkë me kandidatin për Kryeministër z. Ardian Gjini, të dalë fuqishëm në këto zgjedhje, me listën dhe emrat më të mirë që mund të ketë një grupim politik”, ka shkruar Lekaj.
Ai ka shtuar se beson që Aleanca për Ardhmërinë e Kosovës, së bashku me kandidatin për kryeministër Ardian Gjini, do të arrijë rezultat pozitiv në zgjedhjet e ardhshme.
Në reagimin e tij, Lekaj ka përmendur edhe kreun e partisë, Ramush Haradinaj, për të cilin tha se “do të mbetet gjithmonë shtyllë dhe themel i familjes sonë politike”.
“Për më shumë se 26 vite, Ramush Haradinaj ndërtoi një familje të fuqishme politike, duke mbledhur rreth vetes njerëzit më të zotë dhe më të përkushtuar të vendit. Kosova pati fatin që në dy mandate ai, bashkë me familjen politike të Aleancës, të ishte në krye të Qeverisë. Gjatë atyre mandateve u realizuan projekte dhe vendime të rëndësishme, të cilat sot janë pjesë e historisë më të re të Kosovës. Personalisht, kam pasur nderin të jem në krah të Ramushit gjatë gjithë rrugëtimit të tij politik. Të jesh pranë një udhëheqësi dhe burrështetasi si ai është fat dhe privilegj i veçantë. Kryetari ynë, Ramush Haradinaj, do të mbetet gjithmonë shtyllë dhe themel i familjes sonë politike, andaj ju ftoj të gjithëve që të punojmë për fitoren e datës 7 Qershor”, ka thënë ai.
Në fund, ai u ka bërë thirrje mbështetësve të AAK-së që të angazhohen për fitoren në zgjedhjet e 7 qershorit.
Ndryshe, Lekaj ka qenë ministër dhe deputet, po ashtu edhe kryetar i Komunës së Gjakovës për një mandat./teve1.info/
