Panairi i Librit, është drejt fundit.
E ky organizim, siç duket nuk ka sjellë rezultate sikurse ata të mëparshmit.
Shtëpitë botuese thonë se ka pak vizitorë e blerës të librave.
“Vjet ka qenë ma mirë, edhe pse moti ka qenë me shi, por ka pasur vizitorë. E sivjet ku qëndron problemi nuk e di, ndoshta edhe tek reklama. Por edhe një pjesë tash kufijtë që janë hapur për Kosovën, tash një pjesë e trye kanë dalë jashtë shteti. Por, krahasim me vjetshin, ndoshta 50% kemi më pak vizitorë”, ka thënë drejtori i shtëpisë botuese “Nun”, Raif Zaimi.
Megjithatë, një trend më i madh i qarkullimit të njerëzve është vërejtur në fundjavë.
E interesimi më i madh vlerësohet të ketë qenë në librat e psikologjisë e filozofisë.
“Sot jemi në ditën e parafundit të Panarit të Librit, edhe pavarësisht prej ditëve ka ndryshuar nevoja e njerëzve ndaj librit. Dhe sot mund të them se interesi ka qenë i mirë dhe kryesisht temat që kanë kërkuar kanë qenë psikologji e filozofi”, ka deklaruar Kristian Halilaj nga botime “Akropoli i ri”.
Përpos këtyre, ka ankesa për kushtet në të cilat po mbahet ky Panair.
“Sallat janë të vogla, sallat e përurimeve janë modeste, shumë modeste, çmimet janë të ndryshme, zbritjet nuk janë adekuate, sikurse më parë. E kualiteti i botimeve është shumë më i mirë, sepse kemi edhe botime të përkthyera në gjuhë të tjera nga gjuha shqipe, nga letërsia shqipe. Por kemi edhe shumë autorë të huaj të përkthyer në gjuhën shqipe”, ka thënë profesori, Isak Shabani.
Ky është Panairi i 24-të me radhë që organizohet në vend.
Këtë vit, pjesëmarrës ishin rreth 100 botues nga Kosova, Shqipëria, Maqedonia e Veriut dhe diaspora, me rreth gjashtë mijë tituj, prej tyre dy mijë tituj të rinj.
