Nasim Haradinaj iu drejtua Gjykatës së Strasburgut për shkelje të të drejtave gjatë gjykimit dhe mbajtjes në paraburgim nga Gjykata Speciale.
Kjo është padia e parë që i bëhet Speciales nga një ish i akuzuar i saj.
E Haradinajt vlerësohet se i është mundësuar ushtrimi i kësaj padie, falë shtetësisë së tij suedeze.
“Padia që e ka bërë Haradinaj, është bërë në cilësinë e qytetarit suedez dhe në bazë të kësaj që është edhe shtetas i Suedisë, ai ka të drejtë ta bëjë një padi të tillë dhe është shumë me rëndësi që një Gjykatë e tillë e rëndësishme të merr një verdikt dhe të vlerësojë një padi të tillë, dhe kjo do të jetë një gjë e mirë”, tha Astrit Kolaj nga IKD.
Nëse kjo padi ishte bërë nga Haradinaj si shtetas i Kosovës, shqyrtimi i saj vlerësohet se do të ishte i pamundur.
“Bazuar në rolin që Kosova ka aktualisht në arenën ndërkombëtare, vlerësoj që përtej pretendimeve që mund të jenë të bazuara në kuptimin faktik, ka pengesa të natyrës procedurale të cilat në bindjen time do të mund ta bënin të pamundur fillimin e shqyrtimit të një padie të tillë”, tha avokati Ardian Bajraktari.
Haradinaj bashkë më Gucatin, në fund të vitit të kaluar përfunduan dënimin prej 4 vite e tre muaj burgim, për pengim dhe ndërhyrje në drejtësi.
