Kryetari i AAK-së, Behgjet Pacolli, e ka ngushëlluar familjen e të vrarës, Liridona Ademaj, derisa tha se nuk ka mundur të jetë i pranishëm në ceremoninë e rivarrimit, raporton teve1.info
Pacolli përmes një statusi në Facebook, ka shkruar se familjarët dhe bashkëpunëtorët e tij vazhdojnë të jenë afër familjes së Ademajt, derisa ka shtuar se personalisht ishte në një vizitë të largët, për çka nuk pati mundësi të jetë i pranishëm në ceremoninë mortore.
“Familjes së Liridonës iu desh të kalonte sot një tjetër dhimbje nga rivarrimi i saj në rrethanat tragjike. Mendimet dhe lutjet e mia dhe të familjes sime janë me familjen e Liridonës që duhet të vuajë dhimbjen e një krimi të tmerrshëm dhe me fëmijët e saj që ishin aq shumë të lidhur me nënën e saj dhe nuk ishin të pranishëm sot.
Unë nuk munda të marr pjesë sot në ceremoninë e rivarrimit të Liridonës, sepse jam në një vizitë në lindjen e largët Kinë (familjarët e bashkëpunëtorët e mi vazhdojnë të qëndrojnë afër familjes së Liridonës dhe pas kthimit kjo vlen edhe për mua).
Unë dhe familja ime e kemi njohur personalisht Liridonën dhe kishim një miqësi të mirë me të, ajo do të jetë gjithmonë në kujtesën tonë.
U prehtë në paqe Liridona dhe familja e saj të gjejë forcën për të kapërcyer dhimbjen”, ka shkruar Pacolli në Fcebook.
