Organizata e Veteranëve të Luftës së UÇK-së ka shprehur mirënjohje të thellë për përkrahjen e jashtëzakonshme që, sipas saj, ka parë ditëve të fundit për protestën paqësore të thirrur për datën 7 gusht, kundër Gjykatës Speciale në Hagë.
Përmes një postimi në Facebook, OVL UÇK po ashtu ka falenderuar të gjitha partitë politike, pjesëtarët e shoqërisë civile,si dhe mediat për mbështetjen e treguar ndaj thirrjes së tyre.
“Organizata e Veteranëve të Luftës së UÇK-së në emër të këshillit organizues ju shpreh mirënjohje të thellë për përkrahjen e jashtëzakonshme që kemi parë ditëve të fundit për protestën paqësore të thirrur për datën 7 gusht, ora 17:00, në sheshin “Skënderbeu” në Prishtinë. Interesimi i madh i qytetarëve, i shprehur përmes rrjeteve sociale dhe shumë formave të tjera, është një dëshmi e vetëdijes së lartë qytetare dhe e përkushtimit për drejtësi.
Falënderojmë të gjitha partitë politike që e kanë mbështetur publikisht protestën tonë, pjesëtarët e shoqërisë civile që janë bërë zë i arsyes, dhe mediat për hapësirën e ndershme dhe të balancuar që po i japin kësaj thirrjeje. Bashkë, me dinjitet dhe paqë, do të ngremë zërin kundër padrejtësive”, thuhet në reagim.
