Organizata e Veteranëve të Luftës së UÇK-së (OVL UÇK) ka njoftuar se i është drejtuar zyrtarisht ambasadave mike në Kosovë me një letër apeli, duke kërkuar ruajtjen e besimit në drejtësinë ndërkombëtare.
Në këtë letër, organizata shpreh shqetësim për, siç thotë, zvarritjet dhe zhvillimet e fundit në procesin gjyqësor në Hagë ndaj ish-krerëve të UÇK-së. OVL UÇK kërkon që drejtësia ndërkombëtare të mbetet e paanshme, e drejtë dhe në përputhje me standardet universale të të drejtave të njeriut.
Po ashtu, organizata vlerëson mbështetjen e vazhdueshme të shteteve mike ndaj Kosovës, duke theksuar se ruajtja e besimit në sistemin e drejtësisë është jetike për paqen, stabilitetin dhe partneritetin ndërkombëtar të vendit.
