Përzgjedhësi i Kosovës në hendboll, Jesper Ostlund, ka publikuar të mërkurën listën e zgjeruar për ndeshjet me Bosnjë-Hercegovinën.
Ndeshjet i takojnë fazës së dytë kualifikuese për Kampionatin Botëror 2027.
Ndeshja e parë është më 19 mars nga ora 20:00 në Tuzla të Bosnjë-Hercegovinës. Ndërkohë ndeshja e kthimit zhvillohet më 22 mars nga ora 17:00 në Pallatin e Rinisë dhe të Sportit në Prishtinë.
Ostlund i ka ftuar 21 lojtarë në përgatitje për këto dy ndeshje të rëndësishme.
Për herë të parë është ftuar portieri Besa Famgas, Olt Kabashi. Ndërkohë në Kombëtare janë kthyer lojtarë të rëndësishëm si kapiteni Valon Dedaj, zëvendës-kapiteni Kastriot Jupa, pastaj Shaban Zogaj, Olsi Mulaj, Arbios Mushkolaj, Suad Pajaziti, Jon Muqolli e Muhamet Durmishi.
Grumbullimi i Kombëtares bëhet më 15 mars, kurse udhëtimi për në Bosnjë-Hercegovinë planifikohet për 18 mars.
Në raundin e parë kualifikues Kombëtarja jonë e kaloi Britaninë e Madhe, duke e mposhtur në të dy ndeshjet.
Nëse e kalon me sukses Bosnjë-Hercegovinën, Kombëtarja jonë në raundin e tretë dhe të fundit kualifikues luan me Ishujt Faroe.
