Presidentja e Kosovës, Vjosa Osmani, ka zhvilluar sot një vizitë në Komunën e Gjilanit, ku është pritur nga kryetari i komunës, Alban Hyseni, të cilin e uroi për fillimin e mandatit të tij të dytë.
Sipas njoftimit zyrtar, gjatë vizitës, Osmani dhe Hyseni kanë takuar biznese të ndryshme lokale dhe janë ndalur për bashkëbisedim me qytetarë të Gjilanit.
“Falënderojmë përzemërsisht presidenten Osmani për vizitën, për mbështetjen dhe interesimin e treguar për projektet dhe nevojat e Gjilanit”, ka deklaruar Hyseni.
Presidentja Osmani e ka vlerësuar ditën në Gjilan si të mbushur me energji pozitive dhe frymëzim.
Ajo ka thënë se me Hysenin kanë diskutuar për projektet zhvillimore që pritet t’i japin komunës më shumë dinamizëm dhe mundësi të reja.
“Urova kryetarin Alban Hysenin, për mandatin e tij të dytë dhe bashkëbiseduam për projektet që do t’i japin qytetit më shumë zhvillim dhe mundësi të reja”, ka thënë Osmani.
Gjatë vizitës, Osmani është ndalur edhe në Shkollën e Muzikës dhe të Arteve Pamore, ku është mirëpritur me performanca nga Kori i grave “Muza”, si dhe është takuar me fëmijët e kopshtit IP “Integj”, duke i cilësuar momentet si “çaste të paharrueshme”.
Presidentja ka vlerësuar edhe sukseset e kompanisë “Interplas Trocal”, të cilën e quajti lidere në rajon dhe shembull të inovacionit dhe vizionit që i kontribuojnë zhvillimit të vendit.
Në kuadër të vizitës, Osmani dhe Hyseni kanë vizituar edhe klubin e futbollit “Drita”.
Presidentja i ka përgëzuar sportistët për arritjet në garat vendore dhe evropiane.
“Vizituam edhe klubin e futbollit “Drita”, të cilët i përgëzova për rezultatet në nivel shtetëror, e posaçërisht në garat evropiane, në të cilat po na bëjnë krenarë të gjithëve. Faleminderit Gjilan”, është shprehur presidentja Osmani./teve1.info/
