Gani Osmani nga Sindikata e Pavarur e Minatorëve të Trepçës në emisionin “Ditari” ka treguar arsyet se pse minatorëve nuk janë duke iu ekzekutuar pagat.
Osmani tha se minatorët janë të interesuar për të filluar punën, por që kjo s’do të ndodhë pa u ekzekutuar pagat.
“Prej datës 10 korrik minatorët nuk kanë hyrë në minierë dhe nuk kanë prodhuar, nuk kanë qitur xehe. Arsyeja e vetme është mos-ekzekutimi i pagave. Minatorët kërkojnë sqarim, dhe duan ta fillojnë punën, por kjo s’po ndodhë”, tha ai në Tëvë1.
Sipas tij, pagat nuk janë duke u ekzekutuar pasi që kompania është në borxhe të trashëguara por edhe të tanishme.
“Ne kemi kërkuar një zgjidhje që mos m’u ndalë puna, kemi kërkuar zgjidhje deri te Qeveria. Mirëpo, deri sot kjo zgjidhje nuk ka ndodhë… deri sot pagat nuk janë dalë. Na është thënë se kompania është në borxhe të trashëguara edhe më herët, mirëpo edhe tash kanë borxhe të tjera ndaj kompanive private që i furnizojnë e ata përmes përmbaruesve edhe ia marrin mjetet. Minatorëve iu thuhet se edhe nuk po kanë mjete”, deklaroi Osmani.
Osmani tregoi se minatorët edhe pa kushte të mira të punës punojnë, me disa të vjetruara dhe shumë prej tyre gjysmake, por që thotë se “më e keqja në Trepçë është se nuk ka informim të saktë” mbi atë se çfarë duhet të punojnë për të arritur te kushtet e duhura dhe te pagat me rregull.
Sot janë bërë 16 ditë nga hyrja në grevë e minatorëve të ndërmarrjes publike “Trepça”, për shkak të mosrealizimit të pagave të muajit qershor dhe shujtave ushqimore.
Ndërmarrja nuk ka dhënë afat për realizimin e pagesave duke thënë se po mundohen ta zgjidhin këtë situatë sa më shpejtë, derisa me mungesën e minatorëve në punë, “Trepça” humb rreth 30 mijë euro në ditë./teve1.info/
