Presidentja e Kosovës, Vjosa Osmani, të martën është takuar me presidentin e Zvicrës, Guy Parmelin, në kuadër të Samitit Botëror të Qeverisjes.
Osmani ka bërë të ditur se gjatë takimit janë diskutuar hapa konkretë drejt thellimit të bashkëpunimit ndërmjet Kosovës dhe Zvicrës, duke theksuar rolin e mërgatës kosovare si urë kyçe e këtij partneriteti.
Ajo ka nënvizuar se Kosova mbetet thellësisht mirënjohëse për mbështetjen e vazhdueshme të Zvicrës ndër vite.
“Takimet në Samitin Botëror të Qeverisjes i vazhduam me Presidentin e Zvicrës, Guy Parmelin, një mik i madh i popullit të Kosovës. Pas Davosit, vazhduam diskutimin për hapa konkret drejt thellimit të bashkëpunimit ndërmjet dy vendeve tona, me mërgatën tonë si urë kyçe e këtij partneriteti.Kosova mbetet thellësisht mirënjohëse për mbështetjen e palëkundur të Zvicrës ndër vite”, ka shkruar Osmani në Facebook.
Ndryshe, Presidentja e Republikës së Kosovës, Vjosa Osmani, ka udhëtuar zyrtarisht në Emiratet e Bashkuara Arabe, ku po merr pjesë në Samitin Botëror të Qeverisjes.
Osmani është ftuar në këtë samit nga Presidenti i Emirateve të Bashkuara Arabe, Lartmadhëria e Tij, Sheikh Mohamed bin Zayed Al Nahyan.
Në Samitin Botëror të Qeverisjes pritet të marrin pjesë shumë liderë nga mbarë bota, me të cilët Presidentja Osmani do të zhvillojë takime bilaterale, ku do të diskutohen mundësitë për thellimin e bashkëpunimit dhe realizimin e projekteve të përbashkëta strategjike./teve1.info/
