Presidentja e Republikës së Kosovës, Vjosa Osmani, ka pritur të hënën në takim ambasadorin e Republikës Federale të Gjermanisë në Kosovë, Rainer Rudolph.
Sipas njoftimit zyrtar nga Presidenca, gjatë takimit u diskutua për zhvillimet e fundit politike në vend, si dhe për thellimin e bashkëpunimit ndërmjet Kosovës dhe Gjermanisë.
Osmani ka vlerësuar lart marrëdhëniet ndërmjet dy shteteve, duke shprehur mirënjohjen e qytetarëve të Kosovës për mbështetjen e vazhdueshme të Gjermanisë në proceset e shtetndërtimit, zhvillimit demokratik dhe forcimit të subjektivitetit ndërkombëtar të vendit.
Në të njëjtën kohë, ajo ka falënderuar ambasadorin Rudolph për angazhimin e tij personal në avancimin e marrëdhënieve dypalëshe gjatë mandatit të tij, duke ritheksuar përkushtimin e Kosovës për ruajtjen dhe thellimin e aleancës strategjike me Gjermaninë./teve1.info/
