Presidentja e Kosovës, Vjosa Osmani, sot gjatë ditës është takuar me ambasadorin e ri të Turqisë, Sabri Tunç Angılı, me ç’rast ka pranuar letrat kredenciale.
Në njoftimin për media bëhet e ditur se Osmani, ka diskutuar për tërmetet shkatërruese në Turqi, ku ka thënë se populli i Kosovës vazhdon t’i mbështesë projektet e autoriteteve turke për t’i tejkaluar pasojat e kësaj tragjedisë.
“Presidentja Osmani ka folur edhe për tërmetet shkatërruese në Turqi, të cilat kanë shkaktuar mijëra viktima dhe në këtë kontekst ka theksuar se populli i Kosovës vazhdon të solidarizohet me popullin e Turqisë në këtë kohë sfiduese, teksa institucionet kosovare vazhdojnë t’i mbështesin përpjekjet e autoriteteve turke për t’i tejkaluar pasojat e kësaj tragjedie”, thuhet në njoftim.
Në takim është biseduar për marrëdhëniet në mes dy shteteve, ku presidentja ka shprehur përkushtim të Kosovës që raportet bilaterale dhe bashkëpunimi në arenën ndërkombëtare të intensifikohen edhe më tej.
“Me ambasadorin Angılı, Presidentja Osmani bisedoi edhe për thellimin e bashkëpunimit ekonomik, dhe potencialin e rritjes së bashkëpunimit në sfera të tjera të interesit të dyanshëm. Në temën e zhvillimeve aktuale politike dhe të sigurisë, Presidentja Osmani ka theksuar se institucionet e Republikës vazhdojnë të jenë të përkushtuara për paqe të qëndrueshme dhe stabilitet”, thuhet në njoftim.
Gjithashtu, nga presidenca kanë njoftuar se ambasadori Angılı, ritheksoi mbështetjen e Turqisë për anëtarësimin e Kosovës në Këshillin e Evropës dhe organizata tjera ndërkombëtare.
