Presidentja e Kosovës, Vjosa Osmani e ka pritur kryetarin e Komisionit Qendror të Zgjedhjeve, Kreshnik Radoniqi, raporton teve1.info
Në takim, sipas një komunikate për medie, u diskutua për shpalljen e zgjedhjeve të jashtëzakonshme në katër komunat veriore të Kosovës, për çka Osmani tha se ka besim në KQZ-në si administruese e procesit zgjedhor.
Ajo tha se do të ndërmerren të gjitha veprimet në mënyrë që qytetarëve të veriut t’u mundësohet e drejta për të votuar bazuar në ligjet në fuqi.
“Në takim u diskutua lidhur me përgatitjet që po bëhen lidhur me kërkesën për zgjedhje të reja në veri të vendit, nëpërmjet mbledhjes së 20% të nënshkrimeve të trupit votues, ashtu siç parashihet në Ligjin për Vetëqeverisje Lokale dhe Udhëzimin Administrativ të hartuar për këtë çështje. Presidentja shprehu besimin e saj se KQZ-ja, si institucion përgjegjës për administrimin e votimit, do t’i ndërmarrë të gjitha veprimet e duhura dhe brenda afateve që ky proces të realizohet duke respektuar këtë të drejtë të qytetarëve në përputhje me procedurat dhe legjislacionin në fuqi”, thuhet në komunikatën e presidencës.
