Presidentja e Kosovës, Vjosa Osmani e ka takuar presidenten e Sllovenisë, Nataša Pirc Musar, raporton teve1.info
Në takimin e tyre në Mynih, ku aktualisht po mbahet Konferenca për Siguri, Osmani e Pirc Musar kanë diskutuar për vazhdimin e Samitit Bërdo-Brione si dhe zhvillimet e fundit në dialog.
“U diskutua edhe për zhvillimet e fundit në Dialog, si dhe zhvillimet e fundit në fushën e sigurisë në Kosovë dhe rajon.
Ndër të tjera, Presidentja Pirc Musar e informoi Presidenten Osmani mbi prioritetet e saj presidenciale në politikën e jashtme, përfshirë vazhdimin e Samitit Bërdo-Brione. Në takim u rikonfirmua përkushtimi për të vazhduar thellimin e marrëdhënieve miqësore dhe bashkëpunimin e ngushtë me Republikën e Kosovës”, thuhet në komunikatën e lëshuar nga Presidenca e Kosovës.
Në takimin e parë bilateral me presidenten Pirc Musar, Presidentja Osmani e ka përgëzuar për marrjen e detyrës të së pares së shtetit slloven, ndërsa ka shprehur përkushtimin e plotë për të punuar ngushtë në vazhdimin e bashkëpunimit strategjik me Slloveninë edhe gjatë mandatit të saj.
Në takim u diskutua në lidhje me situatën gjeopolitike në Evropë, përfshirë luftën në Ukrainë dhe veprimet destabilizuese të Rusisë të cilat kanë tendencë edhe destabilizimin e rajonit përmes satelitit të Rusisë në Ballkanin Perëndimor, thuhet në komunikatën për medie të Presidencës.
