Pas vizitave në ShBA dhe Letoni, shefja e shteti u rikthyer në Kosovë.
Ashtu siç paralajmëroi, mbajti një konferencë për media.
Presidentja e vendit, Vjosa Osmani, dha detaje për deklaratën e saj të dhënë në SHBA, në lidhje me planifikimet e Serbisë për një sulm të ri ndaj Kosovës.
“Kam deklaruar se Serbia ka pas qëllim dhe ka qëllim që të destabilizojë situatën në Kosovës. Ky vlerësim është bërë mbi bazën e informatave të vazhdueshme. Më konkretisht në fund të muajit maj kemi marrë informacione specifike lidhur me veprimet e Serbisë në kufij me Kosovën. Pas këtyre informatave kam pas takime me organet e sigurisë që më raportojnë, si presidente jemi siguruar që çdo institucion ka mobilizimin e duhur për sigurinë e vendit, u shpreh Osmani të enjten në një konferencë për media.
Për këto deklarime të Presidentes, emisari amerikan, Richard Grenell, tha se Osmani i keqinterpretoi deklarimet e Presidentit Trump.
Për këtë çështje, Osmani kishte një përgjigje.
“Këto janë çështje të brendshme të institucioneve të ShBA-së, pra nuk dua ta komentoj fare, sa i përket asaj që kam deklaruar gjatë vizitës sime në ShBA, unë e kam falënderuar presidentin Trump për rolin e tij në botë por edhe në rajonin tonë në ruajtjen e paqes dhe sigurisë, besoj se secili qytetar i Kosovës është falënderues për rolin e ShBA-ve, ne e ruajmë Kosovën edhe në mbështetje amerikane, i ruajmë kufijtë tanë me prezencën ushtarake amerikane në Kosovë dhe bashkëpunojmë ngushte me administratën amerikane në mënyrë që kontributi ynë si Kosovë të jetë vetëm për paqe, siguri dhe zhvillim”, tha tutje Osmani.
Duke komentuar deklaratën e Presidentit serb, Aleksandar Vuçiq se janë të interesuar për paqe, Osmani tha se kjo është vazhdimësi e propagandës.
“Gënjeshtrat e Serbisë se nuk ndërmerr hapa destabilizues janë pjesë e propagandës së vazhdueshme”, tha e para e vendit.
Presidentja foli edhe për ngërçin e krijuar me konstituimin e Kuvendit. Nëse deri në fundjavë nuk arrihet një marrëveshje, ajo pati një paralajmërim.
“Ne jemi duke e përgatitur lëndën për Kushtetuese dhe në qoftë se edhe gjatë këtij vikendi nuk ka ndonjë marrëveshje e cila mund të rezultojë me institucione të konstituuar, atëherë në fillim të javës ne do t’i drejtohemi Gjykatës Kushtetuese, por ne nuk mund të parashikojmë sesa kohë do të marr pastaj, se mund të marr shumë kohë me u përgjigj e kjo pastaj na fut në një krizë kushtetuese me të cilën Kosova nuk është përballur asnjëherë më herët”, u shpreh Osmani.
Në rast se tejkalohet afati i përcaktuar nga Gjykata Kushtetuese për konstituimin e Kuvendit, atëherë vendi sipas Osmanit, do të shkonte në një krize kushtetuese të paprecedentë.
