Presidentja e Kosovës, Vjosa Osmani, ka pritur në takim lamtumirës ambasadorin e Shqipërisë, Qemal Minxhozi.
Osmani e ka falënderuar për angazhimin e tij të deritashëm, si dhe i ka uruar suksese në angazhimi e mëtejmë.
“Me rastin e përfundimit të mandatit të tij, Presidentja Osmani e falënderoi ambasadorin Minxhozi për angazhimin e tij përgjatë viteve për avancimin e vazhdueshëm të marrëdhënieve në mes të dy shteteve tona simotra. Me këtë rast, ajo e vlerësoi bashkëpunimin, si dhe përkushtimin e ambasadorit Minxhozi për t’i përafruar edhe më shumë qytetarët e vendeve tona”, njofton Presidenca e Kosovës.
Osmani ka deklaruar se bashkëpunimi mes Kosovës dhe Shqipërisë, mbetet prioritet në unifikimin e politikës së jashtme.
“Presidentja Osmani deklaroi se bashkëpunimi ndërmjet Kosovës dhe Shqipërisë, sidomos në unifikimin e politikës së jashtme mbetet prioritet, duke thënë se fuqizimi i vazhdueshëm i koordinimit diplomatik është interes jo vetëm i shteteve tona, por edhe i rajonit në tërësi. Në këtë frymë, Presidentja përmendi edhe nevojën e vazhdimit të thellimit të bashkëpunimit ekonomik në mes të dy shteteve tona”.
Tutje, në këtë takim është diskutuar edhe për zhvillimet e fundit në rajon, si dhe për aktin e agresionit të Serbisë ndaj Kosovës.
“Në takim u diskutua edhe për zhvillimet e fundit në vend e rajon, si dhe mbi aktin e agresionit të Serbisë kundër Republikës së Kosovës, me ç’rast, Presidentja Osmani theksoi rëndësinë e Shqipërisë që të jetë zëri ynë në të gjitha instancat ndërkombëtare ku Kosova ende nuk ka përfaqësim. Presidentja theksoi se shqiptarët në të dy anët e kufirit gjithnjë kanë qenë dhe vazhdojnë të mbeten faktor stabiliteti në rajon, me orientim të qartë euroatlantik”, thuhet në njoftim./teve1.info/
