Presidentja e Kosovës, Vjosa Osmani ka përkujtuar 26 vjetorin e masakrës në Pastaselë të Rahovecit dhe masakrës në Burim të Malishevës.
Osmani ka thënë se historia nuk mund të harrohet dhe se me përkushtim e vendosmëri do të vazhdojnë të kërkojnë drejtësi për viktimat e këtij gjenocidi.
“Një çerek shekulli më parë, forcat e regjimit gjenocidal të Serbisë kryen krime të tmerrshme kundër popullsisë civile në Kosovë. Më 1999, në Pastaselë të Rahovecit, 106 burra, gra dhe fëmijë u vranë e u masakruan brutalisht. E njëjta valë dhune vazhdoi në Burim të Malishevës, ku 42 civilë të pafajshëm u ekzekutuan pa mëshirë. Por kujtesa jonë nuk zbehet. Historia nuk mund të harrohet. Me përkushtim dhe vendosmëri, ne do të vazhdojmë ta mbrojmë të vërtetën dhe të kërkojmë drejtësi për viktimat e këtij gjenocidi”, thuhet në postimin e Presidencës në Facebook.
Në masakrën e Pastaselës janë vrarë dhe masakruar 106 persona nga ky fshat dhe fshatrat tjera përreth, ndërsa në masakrën në Burim të Malishevës, u vranë dhe u masakruan 42 civilë./teve1.info/
