Presidentja e Kosovës, Vjosa Osmani, nga kazermën “Adem Jashari” në Prishtinë, gjatë ceremonisë për 28-vjetorin e Epopesë së UÇK-së dhe rreshtimit të kuadrateve të Forcës së Sigurisë së Kosovës (FSK), ka theksuar se FSK-ja vazhdon trashëgiminë e UÇK-së dhe është e gatshme për çdo sfidë, brenda dhe jashtë vendit.
“Ushtria Çlirimtare e Kosovës ishte zëri i një populli të shtypur. Ishte organizimi i guximit dhe shpresës që u ngrit kundër padrejtësisë. Epopeja e marsit ’98 është dëshmi se liria fitohet me sakrificë, me unitet, me besim në të drejtën tonë për të jetuar të lirë në vatrat tona shekullore. Sot krenaria jonë nuk qëndron vetëm në të kaluarën. Ajo marshon para nesh me uniformë moderne, me profesionalizëm të lartë dhe me përkushtim të palëkundur ndaj Republikës sonë. Forca e Sigurisë së Kosovës është trashëgimtare denjë e UÇK-së. Ajo bart në zemër idealin e lirisë dhe në duar mban përgjegjësinë e sigurisë së vendit. E trajnuar sipas standardeve më të larta ndërkombëtare, e pajisur me kapacitete moderne dhe me trupa të përgatitur profesionalisht, FSK-ja sot është e gatshme për çdo sfidë. FSK-ja jo vetëm që është e aftë ta mbrojë atdheun në çdo kohë, por është gjithashtu e përgatitur të kontribuojë edhe në misione ndërkombëtare të paqes dhe sigurisë globale”, tha Osmani.
Presidentja gjithashtu përkujtoi sakrificën e komandantit legjendar Adem Jashari dhe familjes së tij në Prekaz:
“Ne rikujtojmë çmimin e lirisë dhe betimin që u bë që ne sot të jetojmë të lirë dhe me dinjitet. Në këtë tokë që dikur u drodh nga krismat e armëve të lirisë, sot qëndron krenare kazerma ‘Adem Jashari’, një emër që nuk është thjesht emërtim institucional, por është mbi të gjitha një amanet. Është përkujtim i përjetshëm i një figure që është bërë simbol i përjetësisë kombëtare, komandantit legjendar Adem Jashari dhe i gjithë familjes Jashari. Ata nuk zgjodhën rrugën e lehtë, por zgjodhën sakrificën, përballjen dhe mbi të gjitha përjetësinë. Familja Jashari është altar i lirisë kombëtare dhe krenari e çdo shqiptari”, tha ajo.
Ky manifestim u zhvillua në kazermën “Adem Jashari” në kuadër të aktiviteteve përkujtimore të 28-vjetorit të Epopesë së UÇK-së dhe rreshtimit të kuadrateve të FSK-së, duke simbolizuar lidhjen ndërmjet të kaluarës heroike dhe ushtrisë moderne të Kosovës.
