Presidentja Vjosa Osmani tha se kurdo që partitë politike kanë dakordim për të shkuar në zgjedhje, shpërbëhet Parlamenti apo krijohet mocioni i mosbesimit për Qeverinë, ajo është e gatshme t’i shpallë ato, raporton teve1.info
Gjatë deklarimeve para gazetarëve, Osmani tha se po të ketë pajtim dhe dakordim ndërmjet shumicës dërmuese të partive politike që janë në Kuvendin e Kosovës, për një datë më të hershme, ajo do të shpallë datën e re të zgjedhjeve brenda 30 deri 45 ditëve.
“Zgjedhjet sipas afateve të rregullta duhet të mbahen në fillim të vitit 2025, në qoftë se partitë politike kanë dakordim për t’i mbajtur ato më herët, janë disa opsione të cilat i lejon Kushtetuta e Kosovës. Një prej tyre është që Kuvendi të shpërndahet më herët, por për një gjë të tillë duhet 2/3 e votave, duhet një lloj pajtimi ose dakordimi ndërmjet shumicës dërmuese të partive politike që janë në kuvendin e Kosovës, për një datë më të hershme. Në qoftë se arrijnë këtë dakordim, në momentin ata që dakordohen dhe e shpërndajnë kuvendin, si presidente unë e shpalli datën e re të zgjedhjeve brenda 30 deri 45 ditëve. Nuk ndërhyjë në proceset e tilla”, tha Osmani.
