Presidentja e Kosovës, Vjosa Osmani ka paralajmëruar se nëse deri në fillim të javës nuk do të arrihet ndonjë marrëveshje për konstituimin e Kuvendit, ajo do t’i drejtohet Gjykatës Kushtetuese.
Megjithatë, sipas Osmanit, një përgjigje e vonuar e Kushtetueses lidhur me këtë çështje, do ta çonte vendin në një krizë kushtetuese të paprecedent.
“Ne jemi duke e përgatitur lëndën për Kushtetuese dhe në qoftë se edhe gjatë këtij vikendi nuk ka ndonjë marrëveshje e cila mund të rezultojë me institucione të konstituuara, atëherë në fillim të javës ne do t’i drejtohemi Gjykatës Kushtetuese, por ne nuk mund të parashikojmë sesa kohë do të marr pastaj, se mund të marr shumë kohë me u përgjigj e kjo pastaj na fut në një krizë kushtetuese me të cilën Kosova nuk është përballur asnjëherë më herët”, ka deklaruar ajo në një konferencë për media.
Më tej, presidentja ka theksuar se ajo mund vetëm të bëj thirrje për krijim të institucioneve, pasi roli i saj nuk është që të negociojë koalicione mes partive.
“Nuk është roli i presidentit që të negociojë koalicione unë atë e kam të ndaluar me Kushtetutë. Negociimi I koalicioneve mes partive janë çështje ekskluzivisht të partive politike në të cilat nuk mund të ndërhyjë asnjë president. Pra, unë vetëm mund t’iu bëj thirrje duke përmendur dëmin që po I bëhet Kosovës rreziqet me të cilat përballet Kosova etj.. “, ka thënë Osmani.
