Presidentja e Kosovës, Vjosa Osmani ka pritur sot në takim lamtumirës ambasadoren e Sllovenisë në Kosovë, Minca Benedejčič, me rastin e përfundimit të mandatit të saj diplomatik.
Osmani shprehu mirënjohjen për kontributin e çmuar të ambasadores Benedejčič në forcimin e marrëdhënieve ndërmjet Kosovës dhe Sllovenisë, si dhe për përkushtimin e saj në thellimin e bashkëpunimit bilateral në fusha të ndryshme.
“Gjatë mandatit të Ambasadore Benedejčič, janë realizuar vizita të shumta të nivelit të lartë ndërmjet dy shteteve, të cilat kanë forcuar më tej raportet ndërshtetërore, duke reflektuar miqësinë dhe solidaritetin e ndërsjellë që karakterizon marrëdhëniet ndërmjet popullit të Kosovës dhe atij slloven”, thuhet në njoftimin e Presidencës.
Në këtë kontekst, presidentja vlerësoi rolin e Sllovenisë në mbështetje të Kosovës, që nga periudhat më të vështira historike e deri sot përmes mbështetjes në përpjekjet e Kosovës për anëtarësim në KiE, BE, NATO dhe organizata të tjera ndërkombëtare./teve1.info/
