Ish-presidentja e Kosovës, Vjosa Osmani, ka kujtuar kolonelin Ahmet Krasniqi në përvjetorin e vrasjes së tij, duke vlerësuar kontributin e tij për Kosovën dhe lirinë.
Osmani ka thënë se Krasniqi ishte një ushtarak që jetën dhe dijen e tij ia kushtoi Kosovës, ndërsa në periudhat më të vështira, sipas saj, nuk u tërhoq para përgjegjësisë historike.
“Koloneli ishte ndër ata burra që, në ditët më të vështira, nuk u tërhoqën para përgjegjësisë historike. Ai punoi për ndërtimin e strukturave ushtarake që do ta mbronin popullin dhe idealin e lirisë”, ka shkruar Osmani.
Ajo ka theksuar se Krasniqi u vra në një periudhë kur, sipas saj, Kosova kishte nevojë më shumë se kurrë për njerëz të përkushtuar ndaj saj.
“Por vrasja nuk e vrau idealin për të cilin ai jetoi. Kosova e lirë dhe shteti i saj janë dëshmia më e fuqishme se sakrifica e tij nuk ishte e kotë”, ka deklaruar ish-presidentja.
Osmani ka kërkuar gjithashtu drejtësi për vrasjen e kolonelit Krasniqi, duke thënë se e vërteta duhet të zbardhet.
“Sot, kujtimi për Ahmet Krasniqin është edhe një thirrje për drejtësi. Një shtet që respekton të rënët e vet nuk pajtohet kurrë me heshtjen për vrasjet e tyre. E vërteta dhe drejtësia janë detyrim ndaj historisë, ndaj familjes së tij dhe ndaj brezave që do të vijnë”, ka shkruar Osmani.
Në fund, ajo ka shprehur nderimin për kolonelin Ahmet Krasniqi./teve.info/
