Presidentja, Vjosa Osmani pas takimit me përfaqësuesin e posaçëm të ShBA-së për Ballkanin Perëndimor, Gabriel Escobar ka thënë Kosova do të punojë krahë për krahë me aleatët, në veçanti me ShBA-të, që kufiri të jetë i sigurt dhe të parandalohen sulme si ai në Banjskë.
Osmani tha se me SHBA-të në krahë, çdo përpjekje e Serbisë do të dështojë, ashtu siç ka dështuar edhe me 24 shtator në Banjskë, shkruan teve1.info
Tutje, Osmani tha se pjesëtarët e grupit terrorist duhet që të ekstradohen në Kosovë dhe të gjykohen.
“Bashkë me Escobar diskutuam edhe për sfidat e sigurisë në Kosovë dhe në rajonin tonë, veçanërisht pas sulmit në Banjskë…Grupi terrorist dhe paramilitarë nga Serbia i përfshirë në këtë sulm duhet të përballën me drejtësinë në Kosovë për këtë akt të agresionit, pra duhet të këtë përgjegjësi. Serbia duhet që t’i ekstradojë të gjithë ata që ishin pjesë e planifikimit, financimit dhe organizimit të këtij akti të agresionit ndaj Kosovës dhe stabilitetit në rajon. Ndërsa ne do të vazhdojmë që t’i zbatojmë standardët më të larta për një gjykim të drejtë dhe do të vazhdojmë që të punojmë krahë për krahë me aleatët tanë në veçanti me SHBA-të që kufiri ynë të jetë i sigurt dhe që të parandalojmë sulme të tilla në të ardhmen, për çka jam e bindur që edhe në qoftë se Serbia në të ardhmen tenton një gjë të tillë përderisa punojmë së bashku me SHBA-të do të dështojë, ashtu siç ka dështuar edhe më 24 shtator”, ka thënë Osmani.
Ajo tha se në procesin e dialogut Kosova është thellësisht e përkushtuar dhe se suksesi i tij varët edhe nga qasja parimore dhe e barabartë e ndërmjetësuesit (në këtë rast të BE-së ndaj palëve).
“Procesi i dialogut me Serbinë, është proces në të cilin jemi të përkushtuar. Kam potencuar se suksesi i këtij procesi varet edhe nga qasja parimore dhe e barabartë e ndërmjetësuesit në këtë rast e Bashkimit Evropian ndaj palëve dhe se është kruciale të këtë zbatim të plotë të marrëveshjeve të dakorduara në vitin e kaluar, veçanërisht të marrëveshjes bazike të shkurtit të vitit 2023 dhe aneksit të Ohrit të marsit 2023. Angazhimi dhe roli i ShBA-vë mbetet kyç për një përmbyllje të suksesshme të procesit të dialogut që do të çonte në njohje të ndërsjellë”, tha ajo.
Tutje, presidentja tha se procesi i largimit të katër kryetarëve të komunave në veri të Kosovës është duke u realizuar konform procedurave të përcaktuara me ligj dhe udhëzim administrativ.
“Siç e dini në kuadër të punës sonë të përbashkët edhe procesi i largimit të kryetarëve të katër komunave nga veriu i Kosovës është duke u realizuar konform procedurave të përcaktuara me ligj dhe me udhëzim administrativ në mënyrë që qytetarët e komunave të veriut të mund ta realizojnë të drjetën e tyre të garantuar në ligjin për vetëqeverisje lokale. Presim që ky proces të realizohet brenda parametrave kushtetues dhe ligjor dhe sipas afateve të parapara”, tha Osmani./teve1.info
