Qatip Osmani edhe zyrtarisht do të jetë trajner i skuadrës së Malishevës për sezonin 2025/26.
Tekniku nga Maqedonia e Veriut, ka konfirmuar arritjen e marrëveshjes me Malishevën, ekip tek i cili do të zyrtarizohet së shpejti.
Në një prononcim për mediumet e Maqedonisë së Veriut, Osmani ka thënë se me padurim pret ta udhëheq Malishevën, duke thënë se me punën e të gjithëve në klub, shpreson të arrihen synimet.
Osmani në postin e trajnerit te Malisheva, zëvendëson Bekim Isufin që u largua javë më parë apo më saktësisht pas eliminimit në garat evropiane.
Malisheva u paraqit në raundin e parë kualifikues të Ligës së Konferencës, ku zhgënjeu pasi u eliminua me rezultatin e përgjithshëm 9:0 nga Breidabliku i Islandës.
Osmani 56-vjeçar për herë të parë do të punoj në Kosovë, pasi krahas Maqedonisë së Veriut ka qenë trajner edhe në Shqipëri.
Shkëndija, Renova, Shkupi e Vllaznia janë skuadrat e drejtuara nga Osmani, i cili ka fituar tre tituj kampioni, një kupë dhe një Superkupë të Maqedonisë së Veriut.
