Raportet mes krerëve të shtetit duke se janë në rregull, ndryshe se nga çka janë komentuar në publik.
Një ditë pas deklaratës së kryeministrit Albin Kurti se dallimet me presidenten Vjosa Osmani janë të tejkalueshme, në linjë të njëjtë u shpreh të mërkurën edhe kjo e fundit.
E para e shtetit deklaroi se i vetmi dallim që ka pasur me Ekzekutivin ka qenë moskoordinimi për letrën zotuese për hartimin e draftstatutit të Asociacionit dërguar në Këshillin e Evropës.
“Se cili ka qenë dallimi ju të gjithë e dini, sepse për këtë gjë kemi folur publikisht, tash është e domosdoshme që të gjitha institucioneve e Kosovës, të gjitha partitë politike, bashkërisht të ulemi dhe të reflektojmë për çështje të interesit nacional. Për mua temat e interesit nacional nuk janë detaje të parëndësishme, janë tema të cilat kërkojnë kontributin e secilit prej nesh. Sepse të gjithë e duam Kosovën dhe kur ulemi së bashku dhe vendosim bashkërisht për tema të interesit nacional, atëherë domosdoshmërish rezultati do të jetë i mirë, siç ka dëshmuar historia për këto 25 vite”, tha Osmani.
Osmani ripërsëriti qëndrimin e saj, se duhet të respektohet Aktgjykimi i Gjykatës Kushtetuese, dokumenti i vitit 2015, për Themelimin e Asociacionit të komunave me shumicë serbe.
“Nuk ka asnjë luftë politike, presidentja e Republikës së Kosovës, kërkon vetëm e vetëm që të respektohet Kushtetuta e Republikës së Kosovës, territori i Republikës së Kosovës, funksionaliteti, apo parimi i unitaritetit të shtetit dhe Aktgjykimi i Gjykatës Kushtetuese, sa i përket dokumentit të vitit 2015. Pra këto janë parime bazë të cilat unë kam kërkuar gjithnjë të respektohen e po bëhen më shumë se dhjetë vitë. Atë qëndrim që e kam pas si deputete e mbajë edhe sot”, tha ajo.
Këto deklarata presidentja Osmani i tha pas përfundimit të takimit me Këshillin e Kryetarëve të Asociacionit të Komunave, për çka tha se është e domosdoshme që viktimat e dhunës mbi baza gjinore të jenë të përkrahura nga niveli lokal.
Në anën tjetër, kryetari i Asociacionit të Komunave të Kosovës, Agim Aliu, kritikoi qeverinë për mungesë bashkëpunimi, pasi tha se kërkesat e tyre nuk po trajtohen.
