Presidentja e Kosovës, Vjosa Osmani, ka kërkuar nga kryeministri i Irlandës, Leo Varadkar, mbështetje për statusin e vendit kandidat për BE si dhe anëtarësim në Këshillin e Evropës, raporton teve1.info
Sipas komunikatës për medie të Presidencës, Osmani është shprehur mirënjohëse në mbështetjen e Irlandës ndaj Kosovës si dhe ka kërkuar vazhdimin e kësaj mbështetjeje.
“Presidentja Osmani shprehu mirënjohje për mbështetjen e Irlandës në rrugëtimin e Kosovës drejt anëtarësimit në Këshillin e Evropës. Tutje, ajo theksoi rëndësinë e vazhdimit të kësaj mbështetje drejt anëtarësimit final në Këshillin e Evropës, BE, por edhe në organizata ndërkombëtare. Anëtarësimi në Këshillin e Evropës është në dobi të të gjithë qytetarëve të Kosovës dhe mundëson mbrojtje të avancuar të të drejtave të njeriut.
Më tej, Presidentja Omani ka theksuar se është koha që edhe raportet e Kosovës me BE-në duhet të ngrihen në nivel tjetër.
“Kosova e meriton statusin e vendit kandidat. Kosova mishëron vlerat evropiane, ndaj, në këtë frymë ka pas angazhim të vazhdueshëm që legjislacioni ynë është në harmoni me ligjet e BE-së. Është momenti i duhur që ta marrim statusin e vendit kandidat”, thuhet në komunikatën e Presidencës.
Ndërsa, sipas njoftimit për medie, në raport me zhvillimet e fundit në Kosovë, Osmani theksoi se Kosova tashmë ka bërë hapa përmbajtjesor në deeskalimin e situatës në veri derisa ka thënë se masat e BE-së janë joproporcionale dhe në dëm të qytetarëve të Kosovës.
“Presidentja Osmani shprehu mirënjohje për qëndrimin e Irlandës kundër këtyre masave dhe përsëriti thirrjen për heqjen e tyre, ngase masat aktuale në fuqi kundër Kosovës janë të padrejta dhe krijojnë mungesë ekuilibri në dialog. Kurse sa i përket situatës së sigurisë, Presidentja Osmani tha se mungesa e masave kundrejt Serbisë në lidhje me sulmin terrorist dhe aktin e agresionit të 25 shtatorit në Bansjkë vetëm se e inkurajon atë për të bërë sërish veprime të ngjashme, që cenojnë jo vetëm stabilitetin e Kosovës, por edhe rajonin”, thuhet në njoftimin e Presidencës.
