Presidentja e Kosovës, Vjosa Osmani, ka publikuar një video ku tregon arritjet dhe progresin e Forcës së Sigurisë së Kosovës (FSK), duke theksuar rolin e saj kyç në mbrojtjen e sovranitetit dhe integritetit territorial të vendit.
Në videon e publikuar, përmenden përparimet e FSK-së drejt një force moderne, të mirëpajisur dhe të trajnuar, si dhe kontributi i aleatëve ndërkombëtarë në zhvillimin e saj. Video vë në pah gjithashtu avancimin e grave në institucionet e sigurisë, duke theksuar rëndësinë e pjesëmarrjes së tyre për rritjen e sigurisë në vend.
Presidentja Osmani gjithashtu evidenton mbështetjen e ShBA-së dhe partnerëve të tjerë ndërkombëtarë gjatë rrugëtimit të Kosovës drejt lirisë dhe sigurisë, duke e lidhur këtë kontribut me ndërtimin e institucioneve të sigurisë dhe forcave të armatosura moderne.
Mes mesazheve kryesore të videos është dhe theksimi i rëndësisë së anëtarësimit të Kosovës në organizatat ndërkombëtare, përfshirë NATO-n dhe Bashkimin Evropian, si pjesë e strategjisë së vendit për sigurimin e stabilitetit dhe mbrojtjen e sovranitetit.
Video përfundon duke nënvizuar rolin e FSK-së si aleate e besueshme dhe element kyç i sigurisë dhe stabilitetit të Kosovës.
“FSK ka treguar se është krenaria e shtetit, e gatshme kurdoherë për të mbrojtur sovranitetin dhe integritetin territorial të Kosovës. FSK po marshon fuqishëm përpara në procesin e zhvillimit dhe avancimit si forcë moderne e mirëpajisur dhe e mirëtrajnuar”, tha Osmani.
