Presidentja e Kosovës, Vjosa Osmani, është deklaruar pas takimit me liderët e partive politike, që u zhvillua afro një javë pas dështimit të Kuvendit për të votuar kabinetin e ri qeveritar të propozuar nga mandatari Albin Kurti.
Në fjalën e saj para mediave, Osmani shprehu keqardhje për situatën politike në vend dhe theksoi se partitë ende nuk kanë arritur të konsolidojnë institucionet shtetërore.
“Fat i keq për Kosovën që partitë politike nuk kanë arritur të konsolidojnë të gjitha institucionet, përfshirë Qeverinë. Bashkë me kohën, kemi humbur shumë mundësi për vendin tonë,” tha Osmani.
Ajo kujtoi se sipas aktgjykimeve të Gjykatës Kushtetuese, presidentja ka për detyrë të bëjë përpjekje maksimale për të shmangur zgjedhjet e parakohshme.
“Aktgjykimet e Kushtetueses thonë që presidentja duhet të bëjë çmos t’i evitojë zgjedhjet. Detyrimi i presidentes është që të bëjë gjithçka për t’i shmangur ato,” theksoi ajo.
Osmani kërkoi durim nga qytetarët, duke nënvizuar se do të nevojiten edhe disa ditë për të sqaruar të gjitha rrethanat para se të caktohet mandatarit i dytë për formimin e qeverisë.
“Do t’ju lusim për pak durim edhe pak ditë, derisa të sqarohen të gjitha rrethanat për caktimin e mandatarit të dytë,” u shpreh presidentja.
