Presidentja e Kosovës, Vjosa Osmani ka takuar sot kryetarin e Komisionit Qendror të Zgjedhjeve, Kreshnik Radoniqi, pas zgjedhjeve të mbajtura të dielën në katër komunat veriore të vendit, derisa ka falenderuar edhe institucionet e sigurisë.
Osmani ka thënë që institucionet e Kosovës kanë treguar se grupet kriminale të dirigjuara nga Serbia nuk mund t’i diktojnë proceset kushtetuese e ligjore në Kosovë.
Tutje Osmani ka theksuar se angazhimi i vazhdueshëm i Serbisë për ta penguar zhvillimin e zgjedhjeve të lira në Kosovë është kundër frymës dhe shkronjës së Marrëveshjes së fundit të arritur në Bruksel, së bashku me planin implementues, shkruan teve1.info
Sipas saj, ndërhyrja nga jashtë në procese zgjedhore është një problem global për botën demokratike.
“Republika e Kosovës ka shprehur zotimin e saj në Samitin për Demokraci, të organizuar nën përkujdesin e Presidentit Biden, për të qëndruar krah përkrah me shtetet demokratike për ta luftuar dukurinë në rritje të ndërhyrjes nga jashtë në procese zgjedhore. Angazhimi i vazhdueshëm dhe i hapur i Serbisë për ta penguar zhvillimin e zgjedhjeve të lira në Republikën e Kosovës është kundër frymës dhe shkronjës së Marrëveshjes së fundit të arritur në Bruksel, së bashku me planin implementues”, ka deklaruar Osmani.
Ndër të tjera, Osmani ka theksuar se kjo qasje e Serbisë duhet të kundërshtohet nga bota demokratike, sepse sipas saj paraqet edhe akt të ndërhyrjes së paligjshme nga jashtë.
Madje, Osmani ka deklaruar se institucionet e Kosovës do t’i shtojnë përpjekjet dhe do t’i qëndrojnë pranë qytetarëve në katër komunat veriore, në mënyrë që tëmborhen nga kërcënimet e strukturave ilegale.
“Institucionet e Kosovës do t`i shtojnë përpjekjet dhe do t’i qëndrojnë pranë të gjithë qytetarëve në katër komunat e veriut të Kosovës, në mënyrë që të mbrohen nga kërcënimet e strukturave ilegale. Institucionet e Kosovës poashtu do t`i bashkërendojnë veprimet me aleatët strategjik për t`i ndaluar veprimet e mëtejme destabilizuese të Serbisë, të cilat janë edhe në kundërshtim me marrëveshjen e fundit të Brukselit”, ka deklaruar presidentja Osmani.
