Organizata për Siguri dhe Bashkëpunim në Europë (OSBE) ka reaguar pas dorëheqjeve në bordin e Radio Televizionit të Kosovës, duke kërkuar emërim të shpejtë të të rinjve dhe të drejtorit të përgjithshëm të transmetuesit publik.
Kryetari i bordit të RTK-së, Besnik Boletini dhe anëtarëja e bordit, Arta Berisha. të cilët dhanë dorëheqje u përgëzuan nga OSBE-ja për “shërbimin dhe përkushtimin e tyre ndaj transmetuesit publik”.
“Misioni respekton vendimet e tyre si të marra në interes të respektimit të standardeve më të larta të gazetarisë etike dhe të ruajtjes së integritetit të mediumit publik”, thuhet në reagimin e OSBE-së.
Organizata theksoi rëndësinë e llogaridhënies dhe transparencës “për ruajtjen e besimit të publikut në RTK dhe përkushtimin e saj për raportim të paanshëm dhe të përgjegjshëm mediatik dhe transmetim publik”.
“Tashmë është e domosdoshme që Kuvendi i Kosovës të zgjedhë anëtarët e rinj të bordit të RTK-së si prioritet i lartë sapo të mblidhet sërish, në mënyrë që bordi të funksionojë sërish”, thotë OSBE.
OSBE kërkon që emërimi i anëtarëve të bordit dhe drejtorit të përgjithshëm të RTK-së të jetë “transparent dhe i bazuar qartë në merita”.
RTK-ja momentalisht është pa drejtor të përgjithshëm. Shkumbin Ahmetxhekaj fillimisht dha dorëheqje nga kjo pozitë për shkak të presionit politik, siç tha, ndërsa në vendin e tij, Zana Spahiu nuk qëndroi më shumë se disa ditë si ushtruese e detyrës së drejtoreshës së përgjithshme.
Boletini dhe Berisha dhanë dorëheqje për shkak të, siç thanë, mungesës së përgjegjësisë dhe masave ndaj atyre që ishin përgjegjës për publikimin e një lajmi të rremë se kinse disa media në Kosovë financohen nga Serbia.
