Organizatat Integra dhe Admovere kanë kërkuar falje publike pas reagimeve për ekspozitën “Masakrat në Kosovë 1998–1999”, e cila u prezantua së fundmi në Prishtinë.
Në një reagim në Facebook, ato theksuan se qëllimi i ekspozitës ka qenë nderimi i viktimave civile dhe ruajtja e kujtesës për krimet e luftës, duke shtuar se në asnjë moment nuk kanë synuar të ofendojnë askënd.
Ekspozita u kritikua për pasaktësi në paraqitjen e disa masakrave dhe nxiti reagime nga qytetarë e figura politike. Organizatorët kërkuan falje familjarëve të viktimave dhe njëkohësisht bënë thirrje që të ndalen sulmet, kërcënimet dhe linçimet, duke kërkuar debat të qetë dhe të respektueshëm.
“Përmes këtij reagimi, dëshirojmë të shprehim shqetësimin tonë të thellë lidhur me ndikimin dhe reagimet e shkaktuara nga ekspozita “Masakrat në Kosovë 1998–1999”. Fillimisht, u kërkojmë falje të sinqertë të gjithë familjarëve të viktimave civile të luftës, të gjithë atyre që janë prekur drejtpërdrejt apo tërthorazi nga lufta në Kosovë, bashkëpunëtorëve tanë dhe opinionit të gjerë publik për situatën e krijuar. Qëllimi i ekspozitës sonë ka qenë i qartë dhe i pandryshueshëm: të nderojë viktimat civile të luftës dhe të kontribuojë në ruajtjen e kujtesës kolektive për krimet e kryera në Kosovë. Në asnjë moment dhe në asnjë formë nuk kemi pasur synim të lëndojmë apo të ofendojmë askënd”, thuhet në reagim.
