Partia Demokratike e Kosovës, ka propozuar miratimin e një rezolute me anë të së cilës ofrohet mbështetje në kërkesat e minatorëve të Trepçës.
Shefi i kësaj partie, Abelard Tahiri, gjatë seancës plenare në Kuvend, tha se deri më tani kanë pritur nga Qeveria e Kosovës ta zgjidhin këtë çështje, por që sipas tij, një gjë e tillë nuk ka ndodhur.
“Kemi proceduar një kërkesë për debat me një rezolutë e cila i përkrah po ashtu kërkesat e minatorëve të Trepçës. Tash e 10 ditë minatorët e Trepçës janë në grevë dhe ne nuk kemi dashur ta politizojmë këtë çështje, sepse i kemi dhënë kohë Qeverisë që të zgjidhë këtë çështje dhe minatorët të dalin nga greva. Mirëpo, një gjë e tillë nuk ka ndodhur. Pra, ne rezolutën veçse e kemi proceduar dhe kërkojmë që sot të hyjë si pikë e parë e kësaj seance miratimi i një rezolute me të cilën Parlamenti i Kosovës kërkon mbështetjen e kërkesave të minatorëve të Trepçës”, potencoi Tahiri para deputetëve.
E mbështetje ndaj kësaj rezolute, pati edhe Lidhja Demokratike e Kosovës.
Me ç’rast, Shefi i Grupit Parlamentar i Lidhjes Demokratike të Kosovës, Arben Gashi, the se Kuvendi duhet ta shqyrtojë dhe ta kalojë këtë rezolutë, pasi sipas tij, kërkesat e minatorëve grevistë janë minimaliste.
“Kuvendi ta shqyrtojë dhe ta kalojë një rezolutë e cila i kërkon Qeverisë që kërkesat e tyre të realizohen, sepse kërkesat e tyre janë miniamliste. Çka kërkojnë ata është që të garantohet se pagat kanë me i marrë në fund të muajit”, deklaroi Gashi në Kuvend.
Përkrahja nuk mungoi as nga Aleanca për Ardhmërinë e Kosovës, teksa shefi i kësaj partie, Besnik Tahiri, tha se AAK e mbështetë dhe e konsideron urgjente diskutimin për protestën e minatorëve të Trepçës.
“Aleanca për Ardhmërinë e Kosovës, normal që e mbështetë dhe e konsideron si tepër urgjente që të mbahet një seancë dhe të diskutohet çështja e minatorëve. Po ashtu është me rëndësi të trajtohet me urgjencë edhe protesta e Policëve të Kosovës. Në qoftë se vazhdon ky zinxhir atëherë është devalvuar vendi dhe institucionet e Kosovës”, tha Tahiri tutje.
Sot, është dita e dhjetë e minatorëve të minierës së “Trepçës” që kanë hyrë në grevë.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve./teve1.info/.