Ombudspersoni në Gjykatën Speciale në Hagë , Pietro Spera bëri të ditur se ka mbikëqyrur kushtet në të cilat mbahen të paraburgosurit, siç tha, për t’u kujdesur që aty të respektohen standardet ndërkombëtare.
“Në kuadër të inspektimeve iu ofroj takime të paraburgosurve, në mënyrë privat e konfidenciale. Disa prej tyre më kanë takuar, disa jo. Javën e fundit kam bërë inspektimin e 11-të dhe jam i kënaqur që kushtet e paraburgimit përmbushin standardet më të larta”, shkroi Spera.
Më herët, Hashim Thaçi, Kadri Veseli, Jakup Krasniqi dhe Rexhep Selimi, të cilët po përballen me akuza për krime lufte në Hagë, me një letër i janë drejtuar Ombudspersonit Pietro Spera.
Ish-krerët e UÇK-së rikujtojnë se Dhomat e Specializuara janë krijuar që pretendimet e Raportit të Dick Martyt të marrin një përgjigje adekuate, duke u ankuar se procesi ndaj tyre po përcillet me parregullsi.
Ish–zyrtarët e lartë të shtetit dhe UÇK -së kanë përmendur “vonesat e stërzgjatura të procesit, materialet e vonuara, redaktimet e tepruara” duke thënë se kjo e vonon procesin gjyqësor dhe rrezikon parimin e barazisë të palëve në proces.
