Me të përfunduar ky edicion i Superligës, kanë nisur kërkesat e klubeve karshi futbollistëve cilësorë, me synim përgatitjen qysh tani për sezonin e ri.
Njëri nga lojtarët më të kërkuar në Superligë, është edhe përfaqësuesi i Kosovës, Oltion Bilalli, i cili ishte ndër më të dalluarit te Gjilani në këtë sezon.
22-vjeçari është në radarin e top klubeve nga Superliga e Kosovës, teksa po kërkohet me ngulm nga Ballkani, Drita, Prishtina e Suhareka.
Anësori fantastik i Gjilanit, që ka shënuar tre gola në këtë edicion dhe ka asistuar në shtatë gola të tjerë, është i kërkuar edhe nga skuadra në Rumani dhe në Kroaci.
Bilalli është produkt i shkollës së futbollit Besëlidhja, derisa në vitin 2020, ai iu bashkua akademisë së klubit turk Balikesir, teksa për sezonin 2020/21 u inkuadrua në ekipin e parë, i njohur si Balikesirspor.
Në vitin 2022, ai u kthye te Gjilani, derisa ka qenë i ftuar edhe te Kosova U21.
