Hendbolli i Kosovës po vazhdon të shënojë suksese në transferimin e lojtarëve vendorë në ligat evropiane.
Kësaj radhe, është Olsi Mulaj, djaloshi nga Peja, ai që nga sezoni i ardhshëm do të garojë në Superligën franceze.
Mulaj ka nënshkruar kontratë profesionale me skuadrën Istres, ekip që bën pjesë në elitën e hendbollit francez.
Me këtë transferim, ai bëhet lojtari i parë nga Kosova që firmos një kontratë profesionale në Superligën e Francës.
18-vjeçari është produkt i skuadrës rekordmene nga Kosova, Besa Famgas, ku gjatë viteve të fundit ka qenë shtylla kryesore e ekipit, pavarësisht moshës së re.
Ai gjithashtu ishte vendimtar në kualifikimet e Kosovës për Kampionatin Botëror U19, që do të zhvillohet në Egjipt.
Në këto parakualifikime, Mulaj u shpall MVP i turneut dhe gjithashtu u vlerësua si aloja e majtë më e mirë.
Skuadra e Istres ndodhet në pozitën e 13-të të Superligës së Francës, vend që i garanton qëndrimin në elitë edhe për sezonin e ardhshëm.
