Oda Ekonomike Amerikane në Kosovë ka shprehur shqetësimin e saj lidhur me përdorimin në rritje të masave të njëhershme financiare si përgjigje ndaj sfidave ekonomike dhe inflacionit në vend.
Në një reagim publik, Oda Amerikane theksoi se mbështetja për kategoritë e cenueshme dhe ruajtja e fuqisë blerëse janë të rëndësishme, por vlerësoi se pagesat e përkohshme ofrojnë vetëm lehtësim afatshkurtër dhe nuk adresojnë problemet strukturore të ekonomisë.
Sipas Odës Amerikane, masat që fokusohen kryesisht në stimulimin e konsumit rrezikojnë të kenë ndikim të kufizuar afatgjatë, pasi një pjesë e madhe e konsumit në Kosovë përkthehet në rritje të importeve dhe jo të prodhimit vendor.
Ky institucion kërkoi që fokusi të zhvendoset drejt investimeve strategjike në infrastrukturë, energji, digjitalizim, arsim dhe zhvillim të fuqisë punëtore, duke argumentuar se vetëm përmes forcimit të sektorit privat mund të sigurohet zhvillim i qëndrueshëm ekonomik.
Oda Amerikane ritheksoi se një sektor privat më konkurrues krijon vende të reja pune, ndikon në rritjen graduale të pagave dhe përmirëson standardin jetësor të qytetarëve.
