Nxënësit e SHFMU “Arsim Rexhepi” nga fshati Sazli, Komuna e Ferizajt, të shoqëruar nga mësueset e tyre, zhvilluan sot një vizitë në Drejtorinë Rajonale të Policisë në Ferizaj.
Ata u pritën nga pjesëtarët e policisë, të cilët i informuan mbi strukturën, detyrat dhe përgjegjësitë e këtij institucioni.
Gjatë vizitës, nxënësit shprehën interes për rolin e policisë në ruajtjen e rendit dhe sigurisë publike, duke bërë pyetje dhe duke mësuar më shumë rreth funksionimit të saj.
Në shenjë mirënjohjeje për këtë mundësi edukative, ata dorëzuan një letër falënderimi dhe në përfundim të vizitës, intonuan himnin e policisë para objektit të Drejtorisë Rajonale.
“Policia Rajonale e Ferizajt vlerëson dhe inkurajon iniciativa të tilla, të cilat kontribuojnë në edukimin dhe ndërgjegjësimin e të rinjve mbi rëndësinë e sigurisë dhe respektimit të ligjit”, thuhet në komunikatë.
