Sekretari organizativ në Partinë Socialdemokrate të Kosovës, Nol Nushi, tha se nuk ka subjekt në Kosovë që i ka fituar zgjedhjet në rrugën më të vështirë se kryeministri Kurti, pasi sipas tij, gjatë këtij rrugëtimi kanë vdekur aktivistë e janë burgosur qindra të tjerë.
I ftuar në emisionin “Info Nata”, Nushi tha se këtë lloj rrugëtimi të VV-së nuk e ka asnjë parti tjetër në Kosovë.
“Nuk ka subjekt në Kosovë që i ka fituar zgjedhjet në rrugë më të vështirë se Kurti, nuk ka subjekt që i kanë vdekur aktivistët, janë vrarë në protesta aktivistët dhe janë burgosur me qindra aktivistë, janë lënduar me dhjetëra e qindra që ky sot me marrë karrigen e kryeministrit nuk ka, asnjëri prej subjekteve nuk e ka këtë historik. Kauzat e Vetëvendosjes kanë qenë të fuqishme, nëse ne lejojmë që me votën tonë me pru një kryeministër me kauza të fuqishme i cili i përdhosë ato kauza një nga një”, tha Nushi.
Tutje ai shtoi se Kurti ka filluar ta fus Kosovën në një autokraci, e cila sipas Nushit do të përfundoj me dhunë.
“Ne kemi me zgjedh me votën tonë një autokrat në pushtet i cili e ndërron historinë në momentin që ulët në karrigen e kryeministrit. Ne jemi në fillet e një autokracie, autokratët që kanë fituar në vitet e para të gjithë kanë fituar përmes shpresës, në vitet e fundit të tyre janë bërë të dhunshëm, unë nuk pres që ky e ka rrugën ndryshe, njëjtë do t`a bëjë edhe ky sepse shpresën e madhe popullore do ta përdorë si shkop për me goditë të gjithë atë popull që e kanë votuar”, ka deklaruar Nushi.
