Apeli i paraqitur për dënimin e Lindrit Kamberit nuk ka rezultuar i suksesshëm. Siç ka bërë të ditur Swiss Football League, ankesa ndaj pezullimit prej tri ndeshjesh të mbrojtësit është refuzuar.
Sipas njoftimit zyrtar të ligës, lojtari i FC Zürich u ndëshkua me karton të kuq më 1 mars në ndeshjen kundër BSC Young Boys, pasi kreu një ndërhyrje si lojtari i fundit në mbrojtje dhe rrezikoi integritetin fizik të kundërshtarit. Për këtë veprim, ai u dënua me tri ndeshje pezullim.
Edhe pse klubi i Cyrihut paraqiti apel, vendimi i ligës mbeti i pandryshuar.
Kamberi tashmë ka vuajtur një ndeshje pezullimi në përballjen kundër FC Lausanne-Sport. Megjithatë, mbrojtësi do të mungojë edhe në dy ndeshjet e ardhshme të ekipit të tij.
Ai nuk do të jetë i disponueshëm në sfidën e së shtunës kundër FC Sion, si dhe në ndeshjen e 21 marsit ndaj FC Thun. Për këto dy takime, trajneri Dennis Hediger do të duhet të bëjë pa shërbimet e mbrojtësit të tij.
