Thaçi e Smakaj, nuk e shfrytëzuan të drejtën e tyre për t’u deklaruar rreth fajësisë së tyre për akuzat për pengim të drejtësisë, as në konferencën e parë statusore. Në këtë seancë, prokuroria tregoi se për akuzat e saj do të mbështetet në tre dëshmitarë. E ish presidenti Thaçi kërkoi respektim të Kushtetutës së Kosovës.
Për herë të parë u bënë bashkë, Hashim Thaçi, Bashkim Smakaj, Isni Kilaj, Fadil Fazliu dhe Hajredin Kuçi.
Të ndodhur në një aktakuzë të përbashkët për pengim të drejtësisë, konferencën e parë statusore e ndoqën në gjykatore, të gjithë përpos Thaçit e Smakaj, që morën pjesë në formën online.
Edhe në këtë seancë, nuk u deklaruan rreth fajësisë, Thaçi e Smakaj.
Megjithatë, respektim të Kushtetutës së Kosovës, kërkoi Thaçi.
“Mosrespektimi i Kushtetutës, ligjeve të Kosovës dhe normave të tjera ligjore nga palët në këtë sallë të shenjtë për drejtësinë, paraqet rrezik për minimin e demokracisë në Kosovë, paraqet rrezik për cenimin e besimit qytetar. Prandaj, ftoj që të ruhet përmbajtja institucionale nga të gjithë edhe në këtë sallë”, ka deklaruar ai.
Ai përsëriti, që nuk ka ambicie politike dhe se nuk përbën rrezik për askë.
“Unë dua ta sqaroj edhe njëherë se unë nuk jam pjesë e garës politike dhe as nuk kam ndonjë ambicie politike as për president, as për kryeministër, as për deputet e as për ndonjë ambicie tjetër për ndonjë pozitë tjetër publike. Po e theksoj që nuk jam pengesë e as nuk paraqes rrezik për askënd në kuptimin politik apo për ndonjë projekt qeverisës”.
Për akuzat për pengim të drejtësisë, prokuroria njoftoi se do të mbështetet në tre dëshmitarë.
“Është e vërtetë që ne synojmë të thërrasim tre dëshmitarë të paktën, duke përfshirë atë që është i përmendur me emër apo mbi të cilin është dokumentacioni mbështetës i aktakuzës”, ka deklaruar prokurori i specializuar, Joshua Hafetz.
Prokuroria potencoi se janë në pritje të rezultateve forenzike për provat që janë marrë gjatë bastisjeve tek disa prej të akuzuarve, si dhe tek pajisjet e tyre teknologjike.
