Trajneri i Barcelonës, Xavi Hernandez e ka këshilluar hapur sulmuesin danez, Martin Braithwaite që të gjejë një skuadër të re.
Në konferencë për shtyp pas fitores 4:0 ndaj Real Valladolid, Xavi i ka treguar hapur derën yllit danez: “Ai është lojtar i Barçës dhe ka një kontratë. Por ai e di që nga maji, kur i thashë se nuk e kam në planet e mia, se duhet të merret me largimin e tij. Tani varet nga tregu, nga opsionet që ka. Ai e di qëndrimin tim, e kam thënë shumë qartë.”
Deri më tani në mediat spanjolle është raportuar se Braithwaite nuk dëshiron të largohet. Nuk është çudi, kontrata e tij me katalanasit zgjat deri në vitin 2024, paga vjetore duhet të jetë më shumë se katër milionë euro neto.
Megjithatë tashmë raportohet se Braithwaite ka rënë dakord me Barçën për zgjidhjen e kontratës. Prandaj, klubi do t’i paguajë sulmuesit një pagesë largimi prej pak më shumë se tre milionë euro nëse ai pranon të ndërpresë kontratën.
Vlen të theksohet se Braithwaite nuk ka gjetur ende një skuadër të re, përveç disa klubeve të Premier League, për sulmuesin thuhet se interesohet edhe Galatasaray.
