Qendra Klinike Universitare e Kosovës (QKUK) ka njoftuar se një shtetase e huaj është diagnostikuar me malarie, pasi ishte pranuar më 1 gusht në gjendje tejet të rëndë shëndetësore.
Sipas njoftimit, pacientja ishte dërguar në QKUK pa vetëdije dhe me parametra vitalë e laboratorikë të çrregulluar.
Pas ekzaminimeve klinike, ajo është transferuar në Klinikën Infektive për shkak të shenjave të një infeksioni të rëndë sistemik.
Gjatë vlerësimit epidemiologjik është konstatuar se pacientja kishte udhëtuar së fundmi në vende ku malaria është sëmundje endemike.
Analizat specifike kanë konfirmuar diagnozën, ndërsa menjëherë është nisur trajtimi antimalarik.
QKUK bën të ditur se pacientja vazhdon trajtimin në Klinikën Infektive, nën kujdesin e specialistëve infektologë.
“Fillimisht, ajo ka nisur të komunikojë me vështirësi, ndërsa sot, më 5 gusht 2026, gjendja e saj është e qëndrueshme. Pacientja komunikon lirshëm, ndërsa parametrat vitalë dhe laboratorikë po kthehen gradualisht në vlera normale”, bëhet e ditur në njoftim.
QKUK-ja ka theksuar se malaria nuk transmetohet nga personi te personi përmes kontaktit të zakonshëm, por zakonisht përhapet përmes pickimit të mushkonjave të infektuara.
Institucioni shëndetësor ka rikujtuar se edhe në të kaluarën janë regjistruar raste të importuara të malaries në Kosovë.
“Të gjitha rastet, të raportuara gjatë viteve 2022–2025, kanë qenë të importuara dhe janë diagnostikuar te persona që kishin udhëtuar në vende të kontinentit afrikan ose kishin ardhur prej tyre. Deri më tani, në Kosovë nuk është evidentuar asnjë rast i transmetimit lokal të malaries”, thuhet në njoftimin e QKUK-së./teve1.info/
thuhet në njoftimin e QKUK-së.
