Gjykata Themelore në Prishtinë i ka caktuar një muaj paraburgim ish-komandantit të Njësisë së Policisë në kuadër të Ministrisë së Punëve të Brendshme të Serbisë (MUP), Milojko Gjorgjeviq, i dyshuar për krime lufte.
“Gjyqtari i procedurës paraprake, pas seancës dëgjimore vlerësoj se janë përmbushur kushtet ligjore për caktimin e masës së paraburgimit për të pandehurin M.D. pasi ekziston dyshimi i bazuar se i njëjti ka kryer veprën penale Krime lufte kundër popullatës civile. Ekziston dyshimi i bazuar se me datë 29.04.1999 forcat serbe kishin ndërmarr një ofensivë në fshatin Zhazhë, komuna e Zveçanit, fshat ky i banuar me popullsi shqiptare, ku përveç djegies dhe plaçkitjes së shtëpive, ishin vrarë tre banorë shqiptare brenda fshatit dhe shtatë të tjerë ishin rrëmbyer, të cilët më vonë ishin gjendur në varrezat e fshatit Suhodoll në Mitrovicë, ndërsa sipas dëshmitarëve, i pandehuri M.D. në atë kohë, ka qenë komandant i stacionit policor në Zveçan”, thuhet nga Prokuroria Themelore në Prishtinë.
Gjykata vlerëson se pesha e veprës penale është e natyrës së rëndë andaj “caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme, për zbatimin e suksesshëm të procedurës penale. Gjykata konstatoj se ekziston dyshimi i bazuar se i pandehuri nëse gjendet në liri, mund të arratiset dhe në këtë mënyrë të pengojë rrjedhën me sukses të procedurës penale. Ky dyshim, vërtetohet duke marrë parasysh edhe faktin se përveç shtetësisë së Kosovës, i pandehuri e ka edhe shtetësinë e Serbisë dhe mund të largohet për në Serbi”, thuhet tutje.
Ai u arrestua të enjten, ndërsa të premten ka dal para gjykates.
Sillet në Gjykatën Themelore në Prishtinë i arrestuar për krime lufte në Komunën e Zveçanit
