Ishte nisur për në Kosovë përmes pikëkalimit kufitar në Merdare.
Pikërisht aty, Sinisha Spasiq u arrestua nga Policia e Kosovës pasi që i njëjti dyshohet për krime lufte në Komunën e Vushtrrisë.
Me urdhër të Prokurorisë Speciale, i njëjti u dërgua në ndalim prej 48-orësh.
E të martën, ai doli para Gjykatës Themelore të Prishtinës ku Prokuroria Speciale kërkoi masën e paraburgimit prej 30 ditësh.
Aty thuhet se Spasiq dyshohet që mori pjesë në vrasjen e civilëve të paarmatosur dhe se ka plaçkitur, djegur shtëpi, si dhe ka ushtruar dhunë fizike dhe seksuale ndaj civilëve të paarmatosur.
“S.S. dyshohet se, në bashkëpunim me pjesëtarë të tjerë të uniformuar duke vepruar në grup si zyrtarë të mobilizuar rezervsit aktiv me njësi të përbëra nga Ministria e Punëve të Brendshme e Serbisë, gjatë periudhës së luftës në Kosovë ka marrë pjesë në vrasjen e civilëve të paarmatosur në Komunën e Vushtrrisë. Ndër të tjera, S.S. dyshohet se më 06.04.1999 në bashkëkryerje, gjatë një aksioni ka plaçkitur, djegur shtëpi, si dhe ka ushtruar dhunë fizike dhe seksuale ndaj civilëve të paarmatosur”, thuhet në njoftimin e Prokurorisë Speciale.
E pas tri orësh Spasiq u largua i prangosur nga Gjykata për t’u dërguar në masën e paraburgimit prej 30 ditësh.
“Gjykata konstatoj se ekziston dyshimi i bazuar se i pandehuri S.S. nëse gjendet në liri, mund të arratiset duke pasur parasysh faktin se është shtetas i Serbisë, andaj ka gjasa reale se mund të arratiset dhe i njëjti mund të jetë i pa arritshëm për fazat tjera të procedurës penale.”, kanë njoftuar nga Gjykata Themelore në Prishtinë.
Me këtë vendim nuk u pajtua mbrojtja e Spasiqit, andaj paralajmëruan edhe ankesë në instanca më të larta.
“Thjesht jemi futur në atë fazë, e thashë të parë më herët, pason hetimi dhe me gjasë edhe disa dëshmitarë do të kujtohen për atë që nuk janë kujtuar tashmë 26 vite, dhe ndoshta pason edhe akuza. Thjesht jemi në një situatë të tillë që njerëzit mbyllen, procedohen, pa asnjë dëshmi. Këtë kërkesë që sot ka paraqitur prokuroria speciale dëshmon që nuk përmbush as kushtet themelore që të pranohet, dhe në bazë të kësaj të caktohet paraburgimi kur nuk është dëshmuar dyshimi themelor që z. Spasiç ka qenë pjesëmarrës në atë ngjarje, e ky është kushti themelor për t’u caktuar paraburgim”, është shprehur Pantoviç.
Spasiq sipas Prokurorisë Speciale dyshohet se ka kryer veprën penale “Krime lufte kundër popullsisë civile”.
