Ngjarja që nisi me një kundërshtim të një gjobë trafiku përfundoi me rrahje në Komunën e Prizrenit të martën.
E gjitha kjo sipas autoriteteve, nisi kur qytetari Sefer Fetahaj refuzoi ti bindet urdhrave të Policisë së Kosovës dhe shqeu gjobën që iu shqiptua nga ta.
Hap pasues në këtë rast nga zyrtarët është ndërmarr arrestimi i Fetahaj.
Porse edhe këtu policët kanë hasur në rezistencë.
“Zyrtarët policorë i kanë kërkuar të dëmtuarit të paraqesë dokument identifikimi, por ai nuk i është bindur urdhrit të tyre. Si pasojë, ata kanë tentuar ta arrestojnë. Gjatë përpjekjes për arrestim, i dëmtuari ka rezistuar, dhe në një moment, i pandehuri i ka vendosur këmbën të dëmtuarit me qëllim të neutralizimit të rezistencës së tij, me ç’rast kolegu i tij, zyrtari policor N.B., është rrëzuar së bashku me të dëmtuarin, duke rënë mbi të”, thuhet nga Prokuroria Themelore në Prizren.
Derisa i dëmtuari ishte i shtrirë ndaj tij kanë filluar goditjet nga zyrtari policor.
“Ndërsa i dëmtuari ndodhej në pozitë të shtrirë përtokë, dhe gjatë tentativës për ta vënë nën kontroll, i pandehuri e ka goditur disa herë me grushte në pjesën e kokës, përkatësisht në zonën e syrit dhe të veshit të majtë, duke i shkaktuar lëndime trupore. Me këto veprime, R.P., ka kryer veprat penale të lartëcekura”.
Pas kësaj u aktivizua Inspektorati Policor i Kosovës që suspendoi zyrtarin në fjalë.
Edhe Prokuroria Themelore në Prizren kërkoi masën e paraburgimit ndaj të dyshuarit.
E ndaj të njëjtit Gjykata Themelore në Prizren ka njoftuar se ka caktuar masën e paraburgimit prej 30 ditësh.
Kurse avokati i të dëmtuarit, kërkon dënim maksimal për të pandehurin.
Ndaj policit rëndojnë dy vepra penale, “Keqtrajtimi gjatë ushtrimit të detyrës zyrtare ose autorizimeve publike” dhe “Lëndimi i rëndë trupor”.
Aktualisht, viktima po merr trajtim mjekësor në Qendrën Klinike Universitare të Kosovës.
