Gjykata Themelore në Gjakovë i ka caktuar masën e paraburgimit prej një muaji të pandehurit Q.S., i dyshuar për veprën penale “vrasje”, lidhur me rastin që ndodhi më 5 maj në Gjakovë.
Sipas kërkesës së Prokurorisë Themelore në Gjakovë, i dyshuari dyshohet se rreth orës 02:30, në rrugën “Mbretëresha Teuta”, pas një mosmarrëveshjeje të çastit, ka goditur me brisk në gjoks tani të ndjerin R.B., duke i shkaktuar plagë vdekjeprurëse.
Në dosjen e Prokurorisë thuhet se konflikti kishte nisur brenda një automjeti të tipit “Skoda”, ku ndodheshin disa persona, përfshirë të dyshuarin dhe viktimën.
Pas daljes nga vetura, përplasja verbale ka eskaluar në konflikt fizik, ku i dyshuari dyshohet se ka nxjerrë briskun dhe ka goditur viktimën në pjesën e majtë të gjoksit, në drejtim të zemrës.
Viktima ishte dërguar fillimisht në ambulancën e qytetit dhe më pas drejt Spitalit Rajonal, por kishte ndërruar jetë gjatë rrugës, rreth orës 03:10.
Vendimi për paraburgim është marrë nga gjyqtari i procedurës paraprake në Departamentin e Krimeve të Rënda, Driton Sadiku, i cili ka vlerësuar se janë plotësuar kushtet ligjore për caktimin e kësaj mase.
“Me këtë vendim, i pandehurit Q. S., do të mbahet në paraburgim në kohëzgjatje prej një (1) muaji, periudhë kjo që do të llogaritet nga data e arrestimit me 5 maj 2026 deri më 4 qershor 2026”, thuhet në njoftim.
Sipas vendimit, paraburgimi do të zgjasë deri më 4 qershor 2026, ndërsa palët kanë të drejtë ankese në Gjykatë e Apelit e Kosovë.
Ndryshe, në raportin 24 orësh të enjten, Policia njoftoi se është arrestuar edhe i dyshuari i dytë lidhur me këtë rast./teve1.info/
