Një person ka vdekur dhe të paktën 35 të tjerë janë lënduar pasi një kamion goditi një stacion autobusi në veri të Tel Avivit.
Policia izraelite e përshkroi atë si një “ incident terrorist”, pasi kamioni u përplas në një ndalesë pranë bazës ushtarake Glilot dhe selisë së agjencisë izraelite të spiunazhit Mossad.
Autoritetet bënë të ditur se shoferi, i cili kishte nënshtetësi izraelite u vra nga të shtënat me armë nga një civil.
Ministri i Sigurisë Kombëtare i Izraelit, Itamar Ben-Gvir tha se ky ishte një sulm i qëllimshëm.
“Siç tha shefi i policisë, ky incident është cilësuar si sulm dhe kështu duhet të hetohet. I jap mbështetje të plotë si policisë ashtu edhe qytetarëve që e vranë sulmuesin”, tha ai,raporton AP.
Sulmi, i cili la disa njerëz të ngecur nën automjete, ndodhi teksa izraelitët po ktheheshin në punë pas një pushimi njëjavor.
Hamasi, grupi palestinez i shpallur organizatë terroriste nga Shtetet e Bashkuara dhe Bashkimi Evropian dhe grupi tjetër më i vogël militant, Xhihadi Islamik, mirëpritën këtë sulm të dyshuar, por nuk e morën përgjegjësinë për të.
Ndërkohë bëhet e ditur se drejtorët e CIA-s dhe agjencisë së inteligjencës izraelite Mossad do të takohen sot me kryeministrin e Katarit në një përpjekje për të ringjallur bisedimet për një armëpushim në Gaza.
Negociatat do të shtyjnë për një marrëveshje të re armëpushimi afatshkurtër dhe lirimin e disa pengjeve nga Hamasi në këmbim të lirimit të të burgosurve palestinezë nga Izraeli, raporton Reuters.
Ministria palestineze e shëndetësisë në Gaza thotë se rreth 43,000 njerëz janë vrarë në ofensivën njëvjeçare të Izraelit kundër Hamasit, e cila filloi kur militantët sulmuan Izraelin jugor dhe vranë rreth 1,200 njerëz më 7 tetor 2023.
