Lëvizjet e para nga partitë opozitare kanë filluar.
Larg syrit të medieve të dielën në mbrëmje është zhvilluar një takim mes kryetarit të Lidhjes Demokratike të Kosovës, Lumir Abdixhikut dhe kandidatit të PDK-së për kryeministër, Bedri Hamza në një prej restoranteve në lagjen luksoze Marigona Residence.
Hapat janë bërë por duket që ende nuk ka rezultate.
Një zyrtar i lartë brenda Lidhjes Demokratike të Kosovës i ka thënë televizionit se ende nuk ka diçka konkrete nga këto bisedime.
Bedri Hamza nga PDK ka qenë gjithnjë i hapur për të biseduar me partitë opozitare për një koalicion të mundshëm.
Por, më i rezervuar për këtë çështje është shprehur kryetari i LDK-së, Lumir Abdixhiku, i cili ka vendosur si kusht postin e kryeministrit për partinë e tij.
Megjithatë, një koalicion opozitar nuk është larg mendsh.
Profesori në Universitetin Agder në Norvegji, Abit Hoxha, thotë se është krejtësisht demokratike që opozita ta formoj qeverinë nëse partia fituese në këtë rast Lëvizja Vetëvendosje nuk arrin krijoj shumicën.
“Sistemi elektoral i jep mundësinë partisë së parë që i fiton zgjedhjet ta krijoj qeverinë. Nëse partia Vetëvendosje dështon ta siguroj shumicën, atëherë i takon partisë së dytë që të provoj ta krijoj qeverinë që në këtë rast është Partia Demokratike e Kosovës. Mendoj se nuk do të ketë zgjedhje edhe njëherë sepse edhe nëse mbahen ato pas tre muajsh rezultati do të jetë po ky i njëjti. Pra konsideroj se është krejtësisht demokratike që opozita ta formoj qeverinë”, thotë Hoxha.
Megjithatë, Hoxha paralajmëron se kushdo që e formon qeverinë do të ballafaqohet me shumë sfida serioze për shkak të ndryshimeve gjeopolitike.
“Qeverinë e re e presin shumë sfida siç është çështja e dialogut me Serbinë dhe çështja e Asociacionit të Komunave me shumicë Serbe. Sfida të tjera janë ndryshimet gjeopolitike dhe administrata Trump. Pres që këto 4-5 vitet e ardhshme të jenë shumë sfiduese për Kosovën”, shprehet ai.
Partia Demokratike e Kosovës dhe Lidhja Demokratike e Kosovës e kanë përjashtuar mundësinë e një koalicioni me Lëvizjen e Vetëvendosje e cila i fitoi zgjedhjet e 9 shkurtit me 42.30% të votave.
